INTERNET Ka Baap INRUPT

Bostan : Agar aap apni zindagi kisi pathar ke neechay busr nahi kar rahay to Tim Burner Li ko zaroor jantay hon ge. Inhen internet ka baap kaha jata hai kyunkay yahi woh sahib hain jinhon nay Duniya ko internet aur “World Wide Web” ka tohfa diya. Tim nay internet ijaad to kar diya lekin baad is ki jo shakal ban gayi woh unn ki tawaquaat ke bilkul bar aks saabit hui. Un ka kehna hai ke woh is platform ko communication ki aik azad duniya ke tor par deikhna chahtay they magar is par badri badri companiyon ka qabza hochuka hai jinhon nay apni marzi ke usool zaabtay bana kar sarfeen par pabandiyan aeid kar rakhi hain. Woh is baat ko bilkul pasand nahi karte ke Facebook, Google aur Amazon jaisi companiyon nay internet ko jakar rakha hai aur aam sarfeen ka data un companiyon ke qabzay mein hai. Tim nay is sorat-e-haal ko badalny ke liye khamoshi se aik naye internet ki takhleeq par kaam shuru kar rakha tha aur aap yeh jaan kar heran hon ge ke anqareeb yeh naya internet manzar aam par anay wala hai.

Report ke mutabiq Tim ka kehna hai ke woh guzashta nine (9) mah se internet ki nai shakal INRUPT ke aakhri marhalay par kaam kar rahay they. Is project mein un ki dilchaspi ka andaza is baat se kya ja sakta hai ke unhon nay MIT University jahan woh professor ke ohday par faiz hain, se arzi tor par chhutti le rakhi hai taakay apni tamam tavajja naye internet par markooz rakh saken. Inhen tawaqqa hai ke isi haftay woh naya internet launch karne ki position mein hon ge.