Mazor Log (Special Person) Ab Kary Gay Dunia Ki Sar

Japan mein Technology ke zariye ghar baithy mazoor afraad ko rozgaar faraham karne ka aik tajurbah kya ja raha hai jis ke tehat robot baera (waiter) hotel mein customers ko samaan faraham karen ge aur jismani mazoori ke shikaar afraad ghar baithy inhen internet ke zariye control karen ge. Is zimn mein ensaan numa robot Japan ki mashhoor Avery Laboratory naay tayyar kya hai jis ke Commercial Robot pehlay hi use ho rahay hain taham ab is naye tajorbay mein ghar baithy mazoor afraad robot ko chehray par pehnay jaany walay display ya eyes ki harkat par kaam karne walay sensor ke zariye kayi mil daur se aik cafe mein baith kar control karte hain.

Is amal se ek janib to apahaj (special persons) afraad ki tanhai khatam hogi to doosri janib woh kuch kaam karkay raqam bhi kama sakay ge. Is inqalabi tareeqay se shadeed mazoori mein mubtala afraad ko bhi muashray ka mufeed fard bana kar un mein ahsasِ zimmay daari jagaya ja sakta hai. Company apna mashhoor insaan numa AVR ROBOT istemaal kere gi jo 1.2 meter buland hai aur usay Tokyo ke ek cafe mein aazmaaya jaye ga. 20 kilo gram wazni robot par camera, mic aur speaker nasb hai jis ka data tablet ya display par nashar hota rehta hai. Is terhan ghar baithy dekhnay wala aankhon ke isharay se is robot ko chala kar gahkon(costumers) ki zaroriat poori kar sakay ga. Ek Robot ko A.L.S ke mareez “Nozomu Murata” ne aazmaishi tor par chalaya jis se zahir hota hai ke mazoor afraad robot karkun ko aasani se use kar saktay hain. Ab aglay marhaly mein 26 November se 7 decemeber 2018 taq usay Tokyo ke aik hotel mein aazmaaya jaye ga jahan kayi robot kaam karen ge aur sab ke sab mazoor afraad control karen ge. Agar yeh tajurbah kamyaab hota hai to 2020 mein Tokyo Olympics mein 1 mustaqil robot hotel qaim kya jaye ga. aglay marhaly mein robot ko Hospital aur boorhay afraad ki dekh bhaal ke liye bhi istemaal kya jaye ga.